ab ke matti ki abarat main likhi jaye gi

ab ke matti ki abarat main likhi jaye gi
sabz patoon ki kahani, rukh-e-shadab ki baat
kal ke daryaaon ki mit-ti hoi mubham tehreer
ab faqat rait ke daman main nazar aaye gi
boond bher num ko taras jaye gi besood dua
num ager ho gi koi cheez too meri aankhain
maray palkoon ke darechay meri banjer aankhain
mera ujra hoa chera meri pather aankhain

qehat afsana nahi aur ye be-abr falak
aaj is des kal us des ka waris ho ga
hum se tarkay main milain ge usay bemaar darakht
taiz kirnoon ki tamazaat se chatkhay hoay hont
dhoop ka hurf-e-junoon, lu ka wasiat nama
aur meray sher-e-tilsamaat ki be-daar aankhain
meri be-daar, meri banjer,meri pather aankhain