Ab vahii harf-e-junun sab kii zubaan Thaharii hai
Jo bhii chal nikalii hai vo baat kahan Thaharii hai
Aaj tak shaiKh ke ikaraam mein jo shay thii haraam
Ab vahii dushman-e-diin raahat-e-jaan Thaharii hai
Hai Khabar garm ke phirataa hai gurezaan naaseh
Guftaguu aaj sar-e-kuu-e-butan Thaharii hai
Hai vahii aariz-e-lailaa vahii shiirian kaa dahan
Nigaah-e-shauq ghari bhar ko yahaan Thaharii hai
Vasl kii shab thii to kis darjaa subak guzarii hai
Hijr kii shab hai to kyaa saKht garan guzarii hai
Bikharii ek baar to haath aai kab mauj-e-shamiim
Dil se nikalii hai to kab lab pe fuGaan Thaharii hai
Dast-e-sayyaad bhii aajiz hai kaf-e-gulchiin bhii
Buu-e-gul Thaharii na bul-bul kii zabaan Thaharii hai
Aate aate yun hii dam bhar ko rukii hogii bahaar
Jaate jaate yun hii pal bhar ko Khizaan Thaharii hai
Ham ne jo tarz-e-fuGaan kii hai qafas mein ijaad
"Faiz" gulashan mein vo tarz-e-bayaan Thaharii hai
No comments:
Post a Comment