Khaali hai abhii jaam maiN kuchh soch rahaa hooN
ai gardish e aiyyaam maiN kuchh soch rahaa hooN
saaqii tujhe ik thorhii-si takliif to hogii
saaghar ko mere thaam maiN kuchh soch rahaa hooN
pahale barhii raghabat thii tere naam se mujh ko
ab sun ke teraa naam maiN kuchh soch rahaa hooN
idraak abhii poora taaavun nahiiN kartaa
de baada e gulfaam maiN kuchh soch rahaa hooN
hal kuchh to nikal aayega haalaat ki zid ka
ai kasrat e aalaam maiN kuchh soch rahaa hooN
No comments:
Post a Comment