tum na maano magar haqeeqat hai ishq insaan kii zaroorat hai

tum na maano magar haqeeqat hai 
ishq insaan kii zaroorat hai 

kuchh to dil mubatalaa-e-wahashat hai 
kuchh terii yaad bhii qayaamat hai 

mere mahaboob mujh se jhooTh na bol 
jhooTh soorat-e-gar sadaaqat hai 

jii rahaa hooN is aitamaad ke saath 
zindagii ko merii zaroorat hai 

husn hii husn jalwe hii jalwe 
sirf ehasaas kii zaroorat hai 

us ke waade pe naaz the kyaa kyaa 
ab dar-o-baam se nadaamat hai 

us kii mahafil meN baiTh kar dekho 
zindagii kitanii Khubsoorat hai 

raastaa kaT hii jaayegaa 'Qabil'
shauq-e-manzil agar salaamat hai